Abasuubuzi nga balaga minisita Kamya (wakati) akatambi ng’aba Nabugabo babatulugunya.

ABAKUNGU mu ofiisi ya pulezidenti bawuniikiride ng’abasuubuzi babalaga obujulizi bw’ebintu ebimenya amateeka bye balumiriza kkampuni za kasasiro ezikulemberwa Nabugabo Joint Updeal Venture bye zibakola nga ziyoola kasasiro mu Kampala.

Mu bimu ku bino mwabademu olukalala lw’abasuubuzi abasoba mu 60 abasoloozebwako ssente ezitakkirizika wamu n’obutambi bw’abamu ku bakozi ba Nabugabo nga bayimiridde mu maduuka g’abasuubuzi babakanda ssente za kasasiro nga bwe babatiisatiisa n’okubasiba.

Minisita wa Kampala, Beti Kamya yeekanze bwe yatunudde ku lukalala okwabade abasuubuzi abakolera ku kizimbe kya Crested Towers nga babaggyako 500,000/- okubayoolera kasasiro buli mwezi.

New Annex Hotel nga baabasasuza 350,000/-, Spear motors 350,000/-, Bon Appetit 350,000, Statistics House 200,000/- n’abalala abasoba mu 20 abasasuzibwa wakati wa 50,000/- ne 150,000/- buli mwezi ng’ate kontulakiti gye baakola ne KCCA erambika ssente ndala nnyo (wakati we 3,000/- ne 30,000/- buli mwezi).

Embeera eno yawalirizza Jude Byansi Zziwa avunaanyizibwa ku nsonga za kasasiro n’obuyanjo mu KCCA okusaba abasuubuzi b’ekibiina kya KAAFO abaakoze olukalala luno okumuwaako kkopi ng’agamba nti egenda kumuyamba okwongera okukola okunoonyereza ku nsonga z’abasuubuzi ze baaloopedde gavumenti.

Abasuubuzi abalala okwabadde Godfrey Katongole ne Edward Ntale okuva mu kibiina kya KATA baalaze Kamya obutambi obulaga abakozi ba Nabugabo nga bayimiridde mu maduuka g’abasuubuzi babalemesa okuguza bakasitoma olwa ssente za kasasiro ezibabanjibwa ekyawuniikirizza abaabadewo ne basaba minisita okubannyonnyola oba ye yawa kkampuni eno obuyinza okusibawo amaduuka gaabwe n’okubateekako empingu nga balemedwa okusasula eza kasasiro.

Abalala okwabadde abava mu kibiina kya KACITA abaakulembeddwa Issa Ssekito, omwogezi wakyo, UNTESA abaakulembeddwa Hajji Kigozi Katanyoleka, Salim Kabonge ow’obutale n’abagoba b’ebidduka okwabadde Yasin Ssematimba owa KOTSA ne Mustapha Mayamba owa UTRADA baasabye KCCA okweddiza obuyinza bw’okuyoolera abasuubuzi kasasiro n’okubasalirako ku ssente ezisoloozebwa nga bagamba nti kino kyakumalawo okusika omuguwa okuli wakati w’abasuubuzi ne kkampuni za kasasiro.

Minisita mu kubaanukula yasoose kubeetondera olw’obunafu obwakolebwa KCCA bwe kyalemererwa okulondoola enkola y’emirimu gya Nabugabo ekiviirideko abasuubuzi okutandika okusika omuguwa nayo.

Yabasabye okuba abakkakkamu nga bwe balinda ekinaavamu. Bino byabade mu kibangirizi omutuuzibwa enkiiko ku offiisi za minisitule ya Kampala era muno mwe yategeerezza nga gavumenti bwetegenda kumala gasazaamu kontulakiti ya Nabugabo kubanga ekyalina endagaano egenda okuggwaako mu June 2019

Ssekandi (wakati) ng’ayogera eri bannamawulire. Ku kkono ye Jose Luis Moya, akulira kkampuni ya Ric Energy, ate ku ddyo ye Pawana Sharma owa Great Lakes Africa Energy.

Ekimu ku bino ge masannyalaze g’enjuba Uganda g’erina mu bungi kyokka nga gabadde tegakozesebwa wadde ng’eggwanga lirina obwetaavu bw’amasannyalaze.

Ssekandi yagambye nti Gavumenti emalirizza okukola entegeka z’okukwanaganya bamusigansimbi okuteekawo ekifo ekinaakola amasannyalaze gano e Kabulassoke mu ssaza ly’e Gomba.

“Tulina ddaamu naye n’enjuba gye tulina wano esobola okutuwa amasannyalaze ne tugakozesa nga tetutaddeewo waya oba emisoso emirala ng’egibeera ku masannyalaze ga ddaamu,” Ssekandi bwe yategeezezza.

Yabadde asisinkanye ekibinja kya bamusigansimbi abagenda okuteeka ensimbi mu pulojekiti y’e Kabulassoke ey’amasannyalaze g’enjuba, mu ofi isi ye Nakasero E Kabulassoke, Kabaka gye yawadde bamusigansimbi ettaka okuteekako pulojekiti esuubirwa okusinga obunene wansi w’eddungu Sahara, ng’ekifo kino kisuubirwa okufulumya amasannyalaze agawera ‘megawati’ 20.

Dr. David Alobo nga y’akulira emirimu mu Xsabo Group, yategeezezza nti kkampuni nnyingi ezeegasse okussa ensimbi mu pulojekiti, era bwe banaamaliriza Kabulassoke, baakugenda mu bitundu ebirala.

Pulezidenti Museveni y’asuubirwa okutongoza enteekateeka eno ku nkomerero y’omwezi gwa November.

Ng’oggyeeko amazannyalaze, bano bagenda kuwagira ebintu eby’enjawulo ng’emizannyo, abakyala, okutumbula obulimi bw’emmwaanyi mu bitundu ebitali bimu mu ggwanga, n’ebirala.

Nb

Mukifo bano abayaye abazunga okukolagana ne UMEME bakwataganye amasanyalaze ga damu yamazzi nagabwe aga solar bazze mugovernmenti eno etalina ttaka okugisaba ettaka!

Kwegamba omusana gwaka Gomba woka gyebaba bateeka solar panels miles ne miles ezettaka lya Buganda? Oluvanyuma amasanyalaze ga solar e Gomba gaveyo gajje ewaffe wano e Lubaga? Kubanga wano e Lubaga omusana tegwaka yo okusobola okukola Solar Energy?

Omuntu alina okwegendereza enyo abali mukintu kino. Kirungi nyo okufuna amasanyalaze ga Solar. Kubanga buli muntu yenna kukasolya kenyumba ye omusana gwaka notekayo solar plates kunyumbayo amasanyalaze negatuuka munyumba yo. Kakati bano abagenyi babuuzibwe nyo, ttaka ki erya mailo ne mailo lyebagaala e Gomba okutekayo solar panels? Era nga kundagaano ki ezo Ssabasajja kwabaweerako ettaka lya Buganda?

Ebbibiro lya Isimba erinaatera okuggulwawo. Mu katono ye Ying. Kiggundu

 

Ebbibiro lya Isimba, Gavumenti ly’ezimbye lisuubirwa okuggulwawo mu October omwaka guno kuba ebitundu 80 ku 100 biwedde.

Ebbibiro lino lizimbiddwa Abachina nga lyali lyakumalirizibwa mu August omwaka guno.

EBBIBIRO LISANGIBWA WA

Lisangibwa ku mugga Kiyira ku kyalo Bugobero mu muluka gwa Kasana mu ggombolola y’e Busaana mu disitulikiti ya Kayunga.

Lyesudde kkiromita 15 okuva mu kibuga Kayunga. Oyita mu bubuga obutonotono omuli Busaana ne Kasana okutuuka we liri.

Ebbibiro lino liriraanye omwalo, ekidyeri ekiyunga Kayunga ku Busoga we kisimbula n’okugobera.

Oluguudo olutuukayo terunnaba kukubibwamu koolaasi wabula nga baalulima bulungi era temuli binnya.

OBUSOBOZI BWA KKAMPUNI EYAWEEBWA KONTULAKITI

Gavumenti yakola endagaano ne kkampuni ya China International Water & Electric Corporation mu 2013.

Kkampuni eno erina akakwate n’eya China Three Gorges Corporation eyazimba Three Gorges Dam esinga obunene mu nsi yonna esangibwa e China.

Kino kyoleka obumanyirivu, abali ku mulimu gw’okuzimba Isimba bwe balina.

Isimba Dam egenda kuba nga ekwata ekifo kyakuna mu bunene ku mabibiro agali mu Uganda.

Yatandika okuzimbibwa nga April 30, 2015 yadde endagaano yakolebwa mu 2013.

Ekyalwisa omulimu okutandika, baalina okulinda gavumenti ya Uganda okusooka okuliyirira abatuuze abaalina okusengulwa ku byalo ebyasendebwa.

Gavumenti yakola enteekateeka z’okusengula abantu okuva mu byalo bisatu omuli Nampanyi, Nakakandwa ne Kiteredde. Abatuuze baalinako ennimiro, amaka n’ebifo ebisanyikirwamu.

OBUNENE BW’EBBIBIRO LYA ISIMBA

Ying. Badru Kiggundu, eyali ssentebe w’akakiiko k’Ebyokulonda y’avunaanyizibwa ku kuzimba amabibiro n’okufulumya amasannyalaze mu ggwanga.

Yagambye nti ebbibiro lino kuliko emiryango gya mirundi ena nga kuliko ekyuma obwaguuga ekikuba amazzi agagenda okuvaamu amasannyalaze agenkanankana ‘Mega watts’ 183.

Pulojekiti eno ewemmense ddoola obukadde 550 nga za bbanja eryaweebwa Uganda okuva mu bbanka emu mu China.

Wabula emiryango ebiri gye gigenda okusooka okuggulwawo olwo egisigadde giggulwewo mu March wa 2019.

Kiggundu yasuubizza nti ebbibiro lino ligenda kuyambako okwongera ku bungi bw’amasannyalaze mu ggwanga lyonna n’okukendeeza ku bbeeyi yaago.

Kino kitegeeza nti ebitundu ebibadde tebirina masannyalaze nabyo bigenda kugafuna olwo enkulaakulana yeeyongere.

Yawadde amagezi abantu bonna amasannyalaze gano gye gayita okwetandikirawo emirimu emitonotono egikozesa amasannyalaze galeme okubayitako ate gagende awalala bagaganyulwemu.

ABATUUZE BAFUNYE EMIRIMU

Ebbibiro lino liwadde abantu emirimu. Abakozi bonna awamu basoba mu 3,000. Ku bano kuliko Bannayuganda 2,708 abakola emirimu egyenjawulo okuli okwokya ebyuma, okubajja, okuzimba, bamakanika n’abakola ebyamasannyalaze, abafumbi n’abalongoosa.

Joseph Lutalo: Nali mulimi naye ebirime bibeera bya sizoni. Nasaba omulimu mu kkampani eno era nayigira ku mulimu nga nsasulwa 10,000/- buli lunaku.

Emirimu gye tukola gya maanyi kubanga okola omugongo ne gukufuuyirira. Kati nafuuka kafulu mu kuzimba. Olw’obukugu bwe nfunye wano, kati abantu bampa n’okuzimba amayumba gaabwe.

Ebbanga ery’emyaka ebiri lye maze wano nfunyemu. Nange nsobodde okwegulirayo ekibanja we hhenda okuzimba amaka gange. Wycliff Bwire, mukuumi: Batusasula wakati wa 6,000/- ne 7,000/- buli lunaku.

Okutandika okukola wano kyannyamba kubanga saalina mulimu gwa nkalakkalira. Kati nsobola okuyimirizaawo amaka gange.

Omu ku bakulira emirimu Li HongXu, yagambye nti batendese Bannayuganda mu mirimu egyenjawulo.

Bayinginiya ba Uganda 40 baabasindika e China bongere okubangulwa mu mirimu egy’enjawulo.

Ebikozesebwa ng’enkokoto basooka kugikebera mu ggezeserezo lya ssaayansi (laboratory) ne bapima seminti alina okukozesebwa, obuzito enkokoto bw’erina okwetikka n’obugumu bwayo okwo ne bagattako okugyekebejja okukakasa nti bwe bamala okuzimba ate tefuna nnyaafa.

Bayiwako amazzi buli kiseera okukikuuma nga kiweweevu.

Omwalo gwa Kasana okuli ekidyeri ekigenda mu Jinja.

DDAAMU ENNENE

Isimba eriko obuwanvu bwa kkiromita 42. Yaakuyungibwa ku Bujagali bongere ku bungi bw’amasannyalaze agafuluma n’ebbeeyi esobole okukkako wansi eri abo abakozesa amasannyalaze.

Ate ddaamu ennene zino zaakuliikirizibwa ddaamu entono ezizimbiddwa mu bitundu by’eggwanga eby’enjawulo okuli: Kisizi (0.26MW), Bugoye (13MW), Buseruka (9MW), Nyagak 1 (3.5MW), Mpanga (18MW) ne Ishasha (6.5MW).

BYE BAKOZE OKUKUUMA OBUTONDE

• Bataddemu ebyuma ebikwata amaloboozi okukendeeza ebireekaana ebiyinza okutaataaganya abantu abaliraanye ebbibiro.
• Baakuzimba oluguudo olunene emmotoka ezibadde zisala ku kidyeri nga kwe ziyita.
• Baakuzimbawo ekifo we bakunganyiza kasasiro, okumusunsula n’okumukolamu ebintu eby’omugaso.
• Okuzimbawo ebitangira ettaka okutwalibwa amazzi naddala mukoka.

EKITONGOLE EKIVUNAANYIZIBWA KU BUTONDE BW’ENSI KYOGEDDE

Tony Achidria, omwogezi wa NEMA, ekitongole ekivunaanyizibwa ku butonde bw’ensi yagambye nti, “Nga tetunnaba kuwa kkampuni eno lukusa okuzimba ebbibiro lino twasooka kunoonyereza ku mbeera y’ekitundu kino.

Twatunuulira embeera yaakyo ne tukuba ne ttooci mu biyinza okuddirira ng’ebbibiro limaze okuzimbibwa.

Twasangawo amaka, ennimiro n’ekifo ekisanyukirwamu nga byonna byalina okuvaawo. Era abakola ebbibiro lino gavumenti yalina okubawa ejjinja ery’okwasa basobole okufuna amayinja agasobola okuzimba ebbibiro. Ejjinja baalifuna wansi mu ttaka mu kifo kino kyennyini.

EBYENNYANJA BISENGUSE

Ekitundu we bazimbye ebbibiro baavubangawo ebyennyanja ebyenjawulo omuli empuuta, engege, ekisinja (kino kibeera ne langi eyeefaananyirizaako kyenvu oba golodi).

Wabula byataataaganyizibwa ne biddukawo olw’amaloboozi agava mu mayinja agayasiddwa. Ebyennyanja bitya nnyo ekintu kyonna ekibikanga era kino kyabiwaliriza okusenguka.

Nb

Twabagamba dda nti Uganda nga bweri mu tropics ematizze ensi nyingi okulaba nga efuna amasanyalaze agava mu solar energy afubutuka mumusana buli lunnaku. Awo no amasanyalaze agava kumazzi nago agava kumusana bweganegatta ebbeyi yamasanyalaze wagya kubawo esuubi lingi bbeyi yago okukka wansi enyo. Olwo no Omuntu wabulijjo ave mukukozesa amanda nokutema ebibira okwagala okubimalawo mu ggwanga.

Kizibu nyo okusuubira nti nga waliwo okusasula ebbanja eddene bwelityo erya dollars 500 ate ebbeyi ya masanyalaze nayo neka wansi. Mpozzi nga waliwo okusubira nti mumwaka 2060 nga nabazzukulu bayambye ko okusasula olwo no ebbanja lino nerilyoka liggwayo okulisasula!

 

Aba UMEME nga basima waya ezaaziikibwa mu ttaka

 

UMEME egudde mu bukodyo bakamyufu b’e mulago bwe bakozesa okubba amasannyalaze waya baziyiza mu payipu z’amazzi  balina n’obudde obwenjawulo bwe bakozesa okwerabula ng’aba Umeme bagenze mu kitundu kyabwe .

Ab’ekitongole kya Umeme nga bakumiibwa poliisi ye Mulago ku kapapaali  bakoze ekikwekweto e Mulago  mu zooni ez'enjawulo okuli Katale zooni, Nalwewuuba, Kafeero , Bekeeri   gye baasanze waya eziyisibwa mu payipo z’amazzi , mu nguudo wakati, mu myala , mu kazambi, mu birime  nga bwoba tokigenderedde tosobola kumaanya nti waliwo waya ezitambuza amasannyalaze, bakozesa ne waya z’ebyempuliziganya .

E Mulago bakamyufu balina obude (Alarm ) bwe bakozesa okwerabula nga waliwo aba umeme abali mu kitundu kyabwe  wabula abamu ku batuuze baategeezezza nti emiruka esatu egikola Mulago  gikwata gisooka mu Kawempe mu bubbi bw’amasannyalaze ng’eno buli muzigo ogukozesa amasannyalaze amabbe gusasula 10,000/  okudda wagulu.

Justine Nabatanzi ow’omu Kafeero zooni yategeezezza nti singa Umeme esitukiramu n’eteeka mu nkola etteeka ly’abakwatibwa nga babba amasannyalaze kyandiyambako naye abantu bangi bazze bakubwa amasannyalaze agatali mu mateeka ne bafa kyokka abantu ne bagalemerako .

Christopeher Muhwezi  akulira ebikwekweto by’ababba amasannyalaze mu Kawempe , yategeezezza singa okukwatibwa ng’obba amasannyalaze otwalibwa mu kkooti nga y’esigama kuteeka lya 1999 Umeme Act osibwa  emyaka etaano okudda wagulu.

Yayongeddeko nti  wiiki ebbiri emabega  baakola ekikwekweto e  Mulago  ne basalako amayumba agawerako kyokka baakyewunyizza okuddayo ne basanga bakamyufu bazzaako dda amasannyalaze

Yayongeddeko nti ebitundu ebisinga okubba amasannyalaze mu kawempe kuliko  Mulago  , Kyebando Nsooba , Bwaise , Kawempe mu katale zooni, Nabweru , Kisowera , Kiganda , Kizza , Kagoma , Kawanda , Mpererwe , Kanyanya , Makerere kikoni, Makerere mu kikumi kikumi  , Kaleerwe , Makerere kavule , Katanga n’ebirala.

Nb

Bukenya ng’ali ku muti gw’amasannyalaze kwe baamukwatidde. EKIF: MOSES LEMISA

Ebizimbe bingi mu kawempe bikozesa masannyalaze agatali mu makubo matuufu. Bano kuliko eb’ebibanda bya firimu, ebyuma by’obuwunga, ebbaala n’ennyumba z’abapangisa.

Abatuuze mu miruka; Makerere i-iii, Mulago i-iii, Bwaise I, Wandegeya, Kyebando ne Kanyanya omusango bagutadde ku bakozi ba Umeme be balumirizza nti balina bakamyufu ababasoloolezza ssente ne bazibawa ku buli nkomerero ya mwezi. Obubbi bw’amasannyalaze mu Kawempe abamu baagufuula mulimu.

Amasannyalaze bagayisa mu ttaka, mu kaabuyonjo, mu myala era gasse abantu abawera.

Wabula omu ku bakozi ba Umeme eyatidde okwatuukiriza amannya ge, yategeezezza nti ssinga Palamenti teyisa tteeka ku babba amasannyalaze, tewali kijja kukyukako.

Yagasseeko nti wadde mu UMEME mulimu abakozi abakolagana ne bakamyufu, waliwo ababba amasannyalaze ne batwalibwa ku poliisi n’ebayimbula olw’okubulwa etteeka mw’ebasibira.

Yagambye nti okunoonyereza kulaga nti mu Munisipaali ezikola Kampala, Kawempe ekwata kisooka mu kubba amasannyalaze ng’eddirirwa Nakawa, Makindye ne Lubaga.

BAMUKWATIDDE KU MUTI

Abaserikale ku poliisi y’oku Kaleerwe baakutte Everisto Bukenya 37, ow’e Katooke A ng’ono yasangiddwa waggulu ku muti ng’alina amayumba g’azzaako mu bukyamu.

Bukenya yagambye nti mukozi wa kkampuni ya Aso esangibwa e Kiwaatule era bakolagana n’aba Umeme.

Abatuuze baawadde obujulizi ku Bukenya nti alina bakamyufu b’akolagana nabo okubba amasannyalaze.

Bukenya ekyasinze okumuloopa, yasangiddwa ku muti nga talina kikoofiira, ttaawo wadde giravuzi ebikozesebwa abakozi ba Umeme.

Jane Nakandi ow’omu Kirokole yategeezezza nti mu Kawempe bannannyini mayumba beggyako obuvunaanyizibwa bw’amasannyalaze ng’omupangisa y’alina okwesalira amagezi.

Yagasseeko nti ebikwekweto bya Umeme ku babba amasannyalaze tebikyalina makulu kuba bennyini abagasalako ate babalaba nga bagazzaako.

Nb

Government yetalina busobozi ku technologia aliwo ebiro bino. Erina endowooza nti bwenaleeta ba investors bamasanyalaze ate era bebajja okwota amasanyalaze. Kigamba nti amasanyalaze ga ba investors okukozesa nokwota.
Ekirala buli nyumba bwesasula amasanyalaze (hydro-electricity) ga mitwalo 6 buli mwezi nga erina namasanyalaze ga solar waggulu kukasolya, esobola okuguza UMEME amasanyalaze ga solar ga mitwalo 5 buli mwezi. Kino ekibalo ku bills zawaka mu Uganda kyangu nyo okubalamu.