Published 29 November, 2019

Gareth Onyango owa kkampuni ya Flames Marketing & Advertising omu ku bavubuka abamanyiddwa okulya obulamu era kitunzi akolagana n’amabaala ag’enjawulo mu Kampala okugatumbula, ‘yawangudde omutima gw’Omumbejja bw’amusabye akkirize okumuwasa. 

N’Omumbejja yazzeemu nti nzikiriza olwo kwe kumunaanika empeta. Bino byabadde ku kabaga k’amazaalibwa g’Omumbejja ababiri bano ge baakulizza mu Thailand.

Ebifaananyi ebyakubiddwa n’akatambi akakwatiddwa nga Onyango afukamidde asaba Omumbejja obufumbo n’oluvannyuma ng’alaga olugalo kwe yatadde empeta ebyasaasaanye ku mikutu gya ‘social media’ byacamudde abantu bakira ababiraba nga babayozaayoza okutuuka ku kino.

Omumbejja Nkinzi ne Onyango okumala ebbanga bazze balabibwa nga bali bombi ku bubaga obw’enjawulo ne mu bifo ebisanyukirwamu wano mu ggwanga n’ebweru.

Olw’essanyu lye yafunye n’okukakasa nti ddala ali mu kintu ng’enjogera y’ennaku zino, Onyango yakyusizza n’ekifaananyi ky’abadde akozesa ku nnamba ye eya WhatsApp (Profi le picture) n’awanikayo eky’ababiri (ng’ali n’omumbejja) buli muntu kati kw’atuusizza amaaso.

MMENGO EYOGEDDE

Omwogezi w’Obwakabaka era Minisita w’amawulire e Mmengo, Noah Kiyimba bwe yatuukiriddwa ku nsonga eno yategeezezza nti ensonga eno nkulu ddala era Katikkiro wa Buganda Charles Peter Mayiga y’alina okufulumya obubaka obutongole obugikwatako eri Obuganda.

OKUKULAAKULANYA ennyanja ya Kabaka esangibwa e Ndeeba mu ggombolola ya Mukulu wa Kibuga Lubaga kwolekedde okusomoozebwa naddala ku nsonga y’ettaka n’ensulo ezigiriikiriza.

Ekifo kino kibalirirwa obugazi bwa yiika 49 kyokka mu kiseera kino abantu bangi basenze okuliraana ennyanja nga yiika 21 zokka ze zigambibwa okuba nga zasigalawo.

Abantu abamu balinako liizi, abalala bamazeeko ebbanga ddene wadde tebalinako bwannannyini. Klezia erina poloti ezituukira ddala ku kifo kino ate ab’ekifo ekiyitibwa Tal Cottages nakyo kirina ettaka eririraanyeewo.

Kyokka ensonda mu kitongole ky’ettaka e Mmengo zaategezezza nti ekiseera ky’okutandika omulimu guno we kinaatuukira, bagenda kuddamu okupunta ettaka lino, okwerula yonna gye liyita. Okukulaakulanya ennyanja y’emu ku Pulojekiti eziri ku mwanjo ku nteeketeeka za Katikkiro Charles Peter Mayiga okuli bbanka, okuddaabiriza Olubiri e Mengo, ttivi n’ebirala.

Christopher Ssebuliba nga y’akulira emirimu ku Lukiiko lw’Obwakabaka olukola ku by’obulambuzi n’ebyobuwangwa yategeezezza nti ennyanja eno erina okusomoozebwa nti ezimu ku nsulo enkulu ezigibeezaawo, ziri mu ttaka ly’abantu abalala abaliraanye ekitundu kino naddala ekitundu omuli St. Lawrence University, Lubaga Miracle Centre n’ebirala.

Ssebuliba agamba nti “ ensulo z’ennyanja eno ezimu zisangibwa mu ttaka abantu abaliranyeewo kwe balina obwannannyini nga bwe bakozesa obubi ebifo ebyo, ebeera efuna obuzibu n’olwekyo enteekateeka weeri okwogera nabo okukozesa obulungi ebifo bino.” Okusinziira ku bantu abasiiba mu kifo kino, emidumu mingi okuva mu bizimbe ebyetooloddewo, gyazimbibwa nga giyiwa butereevu mu nnyanja.

Kino kyaleetera Minisita omubeezi ow’ebyobulambuzi e Mmengo nategeza ng’ennyanja bwetafiibweko mangu, ejja kusaanawo kubanga kasasiro n’ettaka byonna byekatta muli ng’ate erwawo okugogolwa. Ensimbi ezigenda okwetaagisa okukulaakulanya ennyanja eno, zaakubeera nnyingi nga zisuubirwa okubeera eyo mu buwumbi wakati w’obutaano 10 oba okusingawo.

Akazinga akali wakati mu nnyanja

Okufuna ssente zino, Mmengo erina okusala amagezi mangi ddala, Pulojekiti eno bwebeera yaakugenda mu maaso. Waliwo okusomoozebwa kw’okukuuma embeera oba obutonde obusangibwa mu kifo buleme kusaanyizibwawo
enkulaakulana eneetekebwawo.

Okugeza amazzi okusigala mu mbeera yaago, ebinyonyi ebisangibwa mu kifo kino okusigala nga bikyatwala ennyanja
eno ng’amaka gaabyo.

Ye Ssentebe w’olukiiko olukunganya ebirowoozo by’okulaakulanya ennyanja, Dr. Keneth Ssemwogerere agamba nti weetaaga entegeka y’okusobozesa abantu okumanya n’okutegera Pulojekiti eno oluvannyuma babeere nga baggyagazisa abalala.

EBISUUBIRWA OKUTEEKEBWAKO

Ebimu ku bisuubirwa okuteekebwa mu kifo kino kuliko; Wooteeri, ekirabo ky’emmere ekiseyeeyeza ku mazzi, awazanyirwa abaana, emizannyo gy’okumazzi, ekifo abantu we banawummulira, ekifo ky’ebyedda nga kirambulula ebyafaayo by’ennyanja eno.

OBUKULU BW’ENNYANJA ENO N’ENSONGA LWAKI ERINA OKUKULAKULAANYIZIBWA

Okusinzira pulaani y’ekitongole kya KCCA etwala ekifo kino ng’ekimu ku by’obulambuzi ebikulu eby’okuleetanga abalambuzi mu kibuga. Ennyanja eno y’esinga obunene mu nsi yonna ezasimibwa abantu nga bakozesa mikono ate nga kiyamba ku mbeera y’obutonde bw’ensi.

Kya bulambuzi ekisobola okufunira Obwakabaka n’eggwanga nsimbi okuva mu balambuzi nga
bwe kibeera kitumbuddwa, kyamuwendo ddala, ekitasangika mu nsi ndala.

Wadde ettaka erisinga lyasengwaako abantu kyokka neririwo lisobola okukozesebwa obulungi ne kuteekebwako ebintu eby’enjawulo omuva ssente ate ekisinga obukulu, kisangibwa mu kibuga wakati. Okukulaakulanyizibwa kw’ekifo kino kutegeza kwongera kufunira bantu mirimu naddala abavubuka abali ku nguudo nga banoonya mirimu

OLUKIIKO OLUKUNG’AANYA EBIROWOOZO:

Omwaka oguwedde Katikkiro yatongoza olukiiko okukung’anya ebirowoozo n’aluwa nsalessale wa myezi mukaaga nga gino gigwaako omwezi ogujja.

January 21,2015 olukiiko luno lwayita abantu n’ebitongole eby’enjawulo ebikwatibwako ensonga y’ennyanja eno okuli ebitongole bya gavumenti eyawakati, abantu abaliranye ennyanja eno,
Bannaddiini, abalina wooteeri n’abalala okukubaganya ebirowoozo. Mu mbeera eno kisuubirwa nti

ku Lwokutaano March 27, 2015 olukiiko luno lwerugenda okukwasa Katikkiro, lipoota omuli ebirowoozo munaana, omuggyibwa ebyo ebinaateekebwa mu nkola.

Twekobe nga elongosebwa abamagye ga Central government nga gagiduseemu.

Gwanga mujje nabaganda bangi nyo ddala nebasonda sente okutandika okugidabiriza.

KABAKA akyalemeddwa okusulamu maka ge amatongole aga Twekobe agasangibwa mu lubiri lwe e Mengo wadde nga gaamalirizibwa ne gakwasibwa mmengo mu Butongole.

Ennyumba ya Twekobe yaddaabirizibwa yonna n’ezzibwawo bulungi era kati etemagana, kyokka kabaka tagisulangamu.

Omulimu gw’okugiddaabiriza gwamalirizibwa mu 2009, nga gwakulirwa Mw. James Mulwana.

Okuva olwo, abantu ab’enjawulo bazze basaba Mmengo ekole enteekateeka esobozesa Kabaka okusula mu Lubiri lwe luno olukulu mu Buganda.

Okusaba kuno kwakulemberwamu Abataka abaasisinkana Kabaka gye buvuddeko ne bamusaba atandike okusula mu Lubiri e Mmengo.

Kabaka, mu kwanukula yabategeeza nti okusaba kwabwe yali ajja kukutuukiriza era n’alagira gavumenti ye ekole enteekateeka ezimusobozesa okutandika okusula mu Twekobe.

Wabula omwogezi w’Obwakabaka Mw. Peter Mayiga bwe yatuukiriddwa, yagambye nti ekikyalemesezza Kabaka okusula mu Twekobe kwe kuba nti temuli ntebe ne kalonda omulala ateekeddwa okubeera mu nju.

Wabula ensonda e Mmengo z’ategeezezza nti Kabaka, agera ekiseera n’asulako mu lubiri lwe kyokka tasula mu Twekobe, ajja ne weema ye gye basimba wabweru wa Twekobe ne yeebaka omwo nti era ne ku mulundi gwe yasembyeyo okusisinkana Abataka mu Lubiri yasuzeemu.

Mu twekobe ye ayingiramu kuba mulimu ofiisi ye mw’akolera emirimu gye n’okusisinkana abantu be. Ate era buli lw’aba agabula Obuganda, abatwala mu Twekobe ne Nnabagereka gy’agabulira abagenyi be.

Twekobe erimu buli kintu kyonna ng’amasannyalaze, amazzi n’ebirala kyokka Mw. Mayiga yagambye nti ekikyabulamu z’entebe n’ebikozesebwa ebirala ebitonotono. Naye teyayogedde kiseera bintu bino lwe binassibwamu Kabaka asobole okugikozesa.

Kangawo ayogedde ku Twekobe Kangawo Gideon Kisitu yagambye nti, Kabaka tasula mu Twekobe, Nnaabagereka yekka y’asula mu Twekobe, Kabaka alina okuzimbirwa ennyumba eyiye emabega wa Twekobe. Ate era ne Namulondo erina okuzimbirwa ennyumba yaayo mu Lubiri.

Kuno kw’ogatta eng’oma za Mujaguzo. Kangawo yagambye nti ennyumba eziwera nga musanvu ze zeetaagisa okuzimbwa mu lubiri nga Kabaka tannadda mu butongole okusula mu Lubiri. Bino nga biwedde, Kabaka asobola
okusiima n’asalawo okudda mu lubiri lwe era tulina kufungiza okulaba nga Kabaka azimbirwa ennyumba eyogeddwaako.

Yagasseeko nti waliwo n’ensonga enkulu etesaana kubuusibwa maaso ey’okunaaziibwako omusaayi ogwayiikaamu mu
biseera by’entalo. “Abantu bangi abattibwanga mu Lubiri nga lufuuliddwa enkambi y’amagye.

Naye ensonga eno ya bajjajjaffe abataka be balina okugikwatako bagitereeze,” Kangaawo bwe yagasseeko.

CATHERINE Kusasira bwe yatuuse e South Africa yayaniriziddwa mu ssanyu abategesi b’olukuηηaana lwa NRM olugenda okwogererwamu Pulezidenti Museveni. Ebintu byatabuse ku Ssande ekiro bwe yagenze okuyimba mu kivvulu kya Bannayuganda ekyabadde e Santon mu Johannesburg.

Bwe yasuddeemu oluyimba lwa “Lino ssi ddogo, nnina mukisa bukisa”, olwo aba NRM ne bamuyiira ssente wakati mu nduulu n’emizira. Kyokka aba People Power abagambibwa nti be baabadde basinga obungi kino baakitutte ng’okubajooga. Ne beekunga okumulemesa okwongera okuyimba.

Baatandise okulekaana nti “twakoowa, mubbye eggwanga. Vvaayo, sirika, tetwagala by’oyimba”. Baabadde ng’abakkakkana ate Kusasira n’abasaanuula bwe yagambye: Nze ndi mwana wa misambwa. Temulina kye mujja kunkola.

Mwenna aboogera muli eno South Afrika mu kweyagala. Ani kummwe eyali alabyeko ku mirambo egyali mu Uganda? Ensi evudde wala okutuuka we tuli kati. Eyo gye twava gye mwagala tudde? Muwagire NRM n’enteekateeka za Museveni. Bakira ayogera bwe bamwanukula ng’abaduumire nti “vva ku siteegi.

Twabakoowa” n’ebirala. Mu kubasirisa, Kusasira yalagidde eyabadde akuba ekidongo (DJ) n’amuteeramu oluyimba lwa “Pokopoko” ng’omuzindaalo gwogerera waggulu. Kusasira yatandise okuyimba n’okuzina ne yeegattibwako abakyala bakira abamufuuwa ssente n’okuzina naye. Aba NRM olwo nabo baabadde balekaana “NRM oyee, jjuu! People Power ‘chini’” n’ebirala. Kusasira yayimbye n’amalako ennyimba ze.

Pulezidenti Museveni asuubirwa e South Afrika gy’anaayogerera mu lukuηηaana lw’aba NRM e Johannesburg ku Lwomukaaga. Entegeka z’amaanyi era waliwo abakungu ba NRM abenjawulo abaasitula edda okuttaanya enteekateeka.

Aba NRM beegattira mu NRM African Chapter. Mu kiseera kye kimu, aba Bobi Wine nabo bategese olukuηηaana. Bobi asuubirwa kusitula nkya ku Lwokuna okugenda mu lukuηηaana luno omunaabeera n’okusonda ensimbi z’okumuyambako mu kalulu ka 2021. Enteekateeka za Bobi Wine zikuliddwa eyakazibwako Jjajja Ibrahim.

Kusasira yategeezezza Bukedde ku ssimu nti aba People Power okumulumba baalowoozezza nti agenze kulemesa lukuη− ηaana lwa Bobi Wine. Ekyo kikyamu kubanga ekyamutwala e South Afrika kusangulawo bulimba n’okukyusa Bannayuganda abaabula nga balimbiddwa nti Museveni mubi. “Ogwantutte ngukoze.

Balinze Museveni bamulabeko era abawe ekifaananyi ekituufu na wa Uganda gy’eraga okwawukanako n’ebibalimbiddwa okuyita ku mikutu gya yintaneti”, bwe yagambye.

Omu ku Bannayuganda abakuba ekyeyo e South Afrika, Peter Sentongo amanyiddwa nga Taata Santon abeera e Santon yategeezezza Bukedde eggulo nti basobeddwa kubanga abantu abaagenda okupakasa ate eby’okunoonya ssente babivuddeko obudde babumalidde mu kakuyege wa NRM ne People Power.

Alowooza nti aba Bobi Wine okugezaako okulemesa Kusasira baayagadde kutataaganya kukyala kwa Museveni kye batasobola kubanga oli mugenyi wa ggwanga lya South Afrika alina obukuumi bwa Gavumenti. Alowooza nti wadde Bobi alagiddwa ng’agenda e South Afrika okuyimba, kyokka agenda lwa byabufuzi.

Lwaki olukiiko lwa People Power lwakubaayo Lwamukaaga nga December 7 ate nga bamanyi nti n’aba NRM bategese olwabwe ku lunaku lwe lumu?

ABATEGESI BYE BOOGERA Franc Muhangi, Ssentebe wa NRM Youth Brigade wansi w’ekibiina kya NRM Southern African Chapter agamba nti ekyabayisa Museveni abakyalire kwagala kumusemba nga ye yekka alina okwesimbawo mu 2021 ku lwa NRM. Aba People power bwe baawulira ng’agendayo nabo ne bayita Bobi Wine.

Yalabudde aba People Power nti bwe baba bategeka kubatabula, South Afrika y’amateeka era bajja kuvunaanibwa. Poliisi ya Southern Africa Police Services (SAPS) emanyi enteekateeka zonna era ejja kubawa obukuumi obwetaagisa. Agamba nti Bobi Wine e South Afrika agenzeeyo kuyimba n’agattamu ebyobufuzi era okumulaba bagenda kusasula Rand 200, eza Uganda 45,000/-

. N’agamba nti tebatidde kubanga Kusasira naye ajja kuyimba zaabike emipiira. Omukulembeze wa NRM omulala, Boris Bede Ssentebe w’ekibiina kya Yellow Family Soldiers (YFS) ekigatta abavubuka b’e Durban e South Afrika yagambye nti bagenda kusaba Museveni akkirize ekifaananyi kye kiteekebwe ku ssente z’eggwanga ng’akabonero k’okumusiima by’akoledde Uganda.

Omwogezi wa People power Joel Ssenyonyi yategeezezza Bukedde nti, abawagizi ba NRM bakitegeere nti bo tebalina budde bwa kugoberera Museveni kubanga nabo balina bingi eby’okukola.

Agamba nti e South Africa, Bobi n’ekibinja kye baayitiddwa baweebwe engule y’okumusiima by’akoledde eggwanga n’okumuzzaamu amaanyi olw’ebyo by’akoze. Era kino baakiteekateeka dda nga tebamanyi nti ne Museveni agenda kubeera e South Africa.

Era nabo baakyekanze bwekanzi nga Museveni naye agenda. Akwanaganya People Power e South Afrika, Jjajja Ibrahim agamba nti Bobi Wine ajja kusisinkana Julius Malema akulira ekibiina kya Economic Freedom Fighters (EFM) ekimu ku biwakanya Gavumenti y’e South Afrika.

Ku Lwokutaano ab’ekibiina kya African Freedom Fighters Association bagenda kumuwa engule y’okulwanirira eddembe mu Afrika. Ku Lwomukaaga akube olukuηηaana lw’ebyobufuzi bwe lunaggwa abakube n’omuziki.

Agattako nti, aba NRM be baabayingiridde kubanga olukuηηaana lwabwe lwasooka kutegekebwa November 23, 2019 ate baagenze okulaba nga baluzizza nga , December 7, nabo kwe balina olwabwe

Nb

Kyewunyisa nyo abaddugavu bano okukyala e South Africa nebatagendako e Sharpeville abafuzi bamatwaale ate nga mwalimu nabaddugavu abasirikale mu mwaka 1960, 21 March, bwebakuba abaana abato abatanatuuka na mu University amasasi nebatta 69 abaali bekalakasa. Ate oluvanyuma yo ensi ya Uganda bi lorry bya Police eno embi enyo eye South Africa, nebigula nebitwala e Kampala. Tewali atamanyi mulimu ebimotoka bino gwebikoze wano e Kampala.

Kyetagisa okumanya obanga African Freedom Fighters Association kibiina mu Africa ekirwanira Abaddugavu be South Africa okulaba nga balina eddembe nokweddiza ettaka lyabwe nokuwona obwavu? Oba balwanira okununula abaddugavu okufuna okulonda okwobwenkanya okwa Democracy ate nga kwaddembe (free and fair) okulonda abakulembeze mu Africa. Kubanga obufuzi obwokufuga amatwaale bwo bwaggwawo dda munsi y'Africa omwali okulinyirira eddembe lyobuntu bwabatuuze b'Africa nokubanyagako ettaka lyabwe.